Analysis of Donald MacGillavry

Donald's gane up the hill hard and hungry
Donald comes down the hill wild and angry
Donald will clear the gouk's nest cleverly
Here's tae the king and Donald Macgillavry
Come like a weigh-bauk, Donald Macgillavry
Come like a weigh-bauk, Donald Macgillavry
Balance them fair, and balance them cleverly
Off wi' the counterfeit, Donald Macgillavry

Donald's run o'er the hill but his tether, man
As he were wud, or stang'd wi' an ether, man
When he comes back, there's some will look merrily
Here's tae King James and Donald Macgillavry
Come like a weaver, Donald Macgillavry
Come like a weaver, Donald Macgillavry
Pack on your back, an elwand sae cleverly
Gie them full measure, my Donald Macgillavry

Donald has foughten wi' reif and roguery
Donald has dinner'd wi' banes and beggery
Better it were for Whigs and Whiggery
Meeting the devil than Donald Macgillavry
Come like a tailor, Donald Macgillavry
Come like a tailor, Donald Macgillavry
Push about, in and out, thimble them cleverly
Here's tae King James and Donald Macgillavry

Donald's the callan that brooks nae tangleness
Whigging, and prigging, and a' newfangleness
They maun be gane; he winna be baukit, man
He maun hae justice, or faith he'll tak it, man
Come like a cobler, Donald Macgillavry
Come like a cobler, Donald Macgillavry
Beat them, and bore them, and lingel them cleverly
Up wi' King James and Donald Macgillavry

Donald was mumpit wi' mirds and mockery
Donald was blindid wi' blads o' property
Arles ran high, but makings war naething, man
Lord, how Donald is flyting and fretting, man
Come like the devil, Donald Macgillavry
Come like the devil, Donald Macgillavry
Skelp them an' scaud them that prov'd sae unbritherly
Up wi' King James and Donald Macgillavry