The Mother's Lesson

Come hither an' sit on my knee, Willie,
Come hither an' sit on my knee,
An' list while I tell how your brave brither fell,
Fechtin' for you an' for me:
Fechtin' for you an' for me, Willie,
Wi' his guid sword in his han'.
Hech, but ye'll be a brave man, Willie,
Hech, but ye'll be a brave man!

Ye min' o' your ain brither dear, Willie,
Ye min' o' your ain brither dear,
How he pettled ye aye wi' his pliskies an' play,
An' was aye sae cantie o' cheer:
Aye sae cantie o' cheer, Willie,
As he steppit sae tall an' sae gran',
Hech, but ye'll be a brave man, Willie,
Hech, but ye'll be a brave man.

D'ye min' when the bull had ye doun, Willie,
D'ye min' when the bull had ye doun?
D'ye min' wha grippit ye fra the big bull,
D'ye min' o' his muckle red woun'?
D'ye min' o' his muckle red woun', Willie,
D'ye min' how the bluid doun ran?
Hech, but ye'll be a brave man, Willie,
Hech, but ye'll be a brave man.

D'ye min' when we a' wanted bread, Willie,
the year when we a' wanted bread?
How he smiled when he saw the het parritch an' a',
An' gaed cauld an' toom to his bed:
Gaed awa' toom to his bed, Willie,
For the love o' wee Willie an' Nan?
Hech, but ye'll be a brave man, Willie,
Hech, but ye'll be a brave man!

Next simmer was bright but an' ben, Willie,
Next simmer was bright but an' ben,
When there cam a gran' cry like a win' strang an' high
By loch, an' mountain, an' glen:
By loch, an' mountain, an' glen, Willie,
The cry o' a far forrin lan',
An' up loupit ilka brave man, Willie,
Up loupit ilka brave man.

For the voice cam saying, 'Wha 'll gang?' Willie,
The voice cam saying, 'Wha'll gang
To fecht owre the sea that the slave may be free,
An' the weak be safe fra' the strang?'
The weak be safe fra' the strang, Willie;
Rab looked on Willie an' Nan,
An' hech, but he was a brave man, Willie,
Hech, but he was a brave man!

I kent by his een he was gaun, Willie,
I kent by his een he was gaun,
An' he rose like a chief: twice we spak in our grief-
'Dinna gang!' 'My mither, I maun!'
When he said, 'My mither, I maun,' Willie,
I gied him his sword to his han'.
Hech, but ye'll be a brave man, Willie,
Hech, but ye'll be a brave man!

An' sae it happened afar, Willie,
Sae it happened afar,
In the dead midnight there rose a great fecht,
An' Rab was first i' the war:
First i' the haur o' the war, Willie,
Wi' his guid sword in his han'!
Hech, but ye'll be a brave man, Willie,
Hech, but ye'll be a brave man!

An' there cam' a dark wicked lord, Willie,
There cam' a dark wicked lord,
An' oh my guid God! on my bauld bairn he rode,
An' smote him wi' his sword:
Smote him wi' his sword, Willie,
But Rab had his guid sword in han'!
Hech, but ye'll be a brave man, Willie,
Hech, but ye'll be a brave man!

He rushed on the fae in his might, Willie,
In his might to the fecht thro' the night,
An' he grippit him grim, an' the fae grippit him,
An' they rolled owre i' the fecht:
They rolled owre i' the fecht, Willie,
Rab wi' his guid sword in han'!
Hech, but ye'll be a brave man, Willie,
Hech, but ye'll be a brave man!

When the gran' stowre cleared awa', Willie,
When the gran' stowre cleared awa',
An' the mornin' drew near in chitter an' in fear,
Still, still, in death they lay twa:
Still, still, in death they lay twa, Willie,
Rab wi' his guid sword in han'!
Hech, but ye'll be a brave man, Willie,
Hech, but ye'll be a brave man.

Then up fra the death-sod they bore him, Willie,
The young men an' maidens they bore him,
An' they mak the rocks ring 'gin my bairn were a king,
An' a' the sweet lassies greet owre him:
A' the sweet lassies greet owre him, Willie,
An' their proud lips kiss his cauld han',
Hech, but ye'll be a brave man, Willie,
Hech, but ye'll be a brave man.

An' they big him a green grass grave, Willie,
They big him a green grass grave,
My ain lad! my ain! an' they write on the stane,
'Wha wad na sleep wi' the brave?'
An' wha wad na sleep wi' the brave, Willie?
Wha wad na dee for his lan'?
Hech, but ye'll be a brave man, Willie,
Hech, but ye'll be a brave man!

Noo come to yon press wi' me, Willie,
Come to yon press wi' me,
And I'll show ye somethin' o' auld lang syne,
When he was a bairnie like thee:
When he was a bairnie like thee, Willie,
And stood at my knee where ye stan',
Hech, but ye'll be a brave man, Willie,
Hech, but ye'll be a brave man.