*** आं अख्रां गंसे दावबायारि***
**** आं अख्रां गंसे दावबायारि****
By - Bangbula Brahma Uzir
*आंलाय दिदोमथि नङा
अरायथाबो नंलिया
सोदोबनि सोलेराव थांखियै
सुबुंखौ गोजोन होसारनो
सुदेम बारबादि नङा
अख्रां गंसे दावबायारिसो ।
सोरांनि थि गुमुराव
थाइनै मेगननि गेजेरजों
सोमखोर मिथिंगानि
नायथावना महरखौ
रोखा - रोखा नायस्राना
उदां अख्राङाव बिरथिंबायना
सनानि फैलाव दुब्लियाव
आदार नागिरथिंबायना
आंहा बुब्राबना बिरनो
फारनै गांखं गांबो दङ ।
बैसागनि बोथोराव
बारदैसिख्लानि आइलि - जाइलि
खानाइ हसारनाय
हौ - हौ , हाव - हाव सोदोबजों
ग्रोम - ग्रोम बिफां - लाइफांफोरखौ
सिमब्रे - सिमब्रा खालामनायजों ,
ग्रं - ग्रं अख्रांनिफ्राय
गुरुं जोमै दाखा सोरखिनानै
सोरगोनि बिफां - दालाइ बारस्लायना ,
बिबारफोरनि बिदै सोबबायना
दैमा - दैसा जिरि हरै - मारुआव
गोदै - गोदै गारां रावाव ,
अबं सोरजिमानि अननायाव ,
मोदोमफ्रु फैना साजायनायाव ,
बिबारफोरनि ज्रय सिरिनायाव ,
अखा आरो मोब्लिबनि
हाजार - हाजार खैदांनि - खैफोदनि गेजेरजों ,
थेवब्लाबो दावबायलांगोन
गोरबोनि दुखु हांमाजों
बाहां - बिरहां , देमलाइ - देमसि ,
थांखिसिम सहैलांनो
आंलाइ अख्रां गंसे दावबायारि दाउ ।
**************************
© Poetry.com