Ye hi hai zindagi

Pankhudi par padi oss ki boond hai zindagi,
Adhar si - naazuk si - kori si,
Khud par ek anoothhi ehsaan si,
Hokar bhi kuch alag anhoni si,
Kuch aisi hi hai zindagi...

Sagar ke garbh mei uthh rahi lehar hai zindagi,
Shor si - halki si - bahaav si,
Chhoone par ek aardra ehsaas si,
Ban kar usi mei bigadti si,
Kuch aisi hi hai zindagi...

Sooraj se aa rahi chamakti kiran hai zindagi,
Damakti si - shobhit si - alka si,
Padne par kuch deti aabha si,
Choone par bhi bilkul anchhoohi si,
Kuch aisi hi hai zindagi...

Dhara ki parto mei ek parat hai zindagi,
Thhos si - majboot si - kathhor si,
Takrane par ek kasak si,
Chattaan fir bhi pighalti si,
Kuch aisi hi hai zindagi...

Aakash mei kadak rahi ek bijli hai zindagi,
Chanchal si - chapla si - chamak si,
Dikh jaye to kapkapati ruh si,
Shor fir bhi mrit khamoshi si,
Kuch aisi hi hai zindagi...

Ishwar ki duniya mei bagiya si hai zindagi,
Rangeen si - mahak si - khoobsurat si,
Mausam ke saath badalte phoolo si,
Khushnumi fir bhi kahi kuch kashish si,
Kuch aisi hi hai zindagi...

"Haan, asal mei aisi hi hai zindagi!!!"