*** नों जेरावनिफ्राय आं नोंनिफ्राय *****

*** नों जेरावनिफ्राय आं नोंनिफ्राय****
By :- Bangbula Brahma Uzir

* सानजा अख्रांनि फैसालियाव
साननि ओंखारनायाव
सोरांनि रिफिनायजों
मा एसे समायफ्लेदों
समायना गावदां महरा
नोंनि..................?
नै
नोंनिनो गिबि जोनोमा
बुहुम बिखायाव ,
आंनि गिबि जोनोमा
नोंनिनो बिखायाव
सोलेरा हाजों दाजानाय ।
नोंनोथ' फोथांबाय
गोर्बो मोनसेजों
नोंनोथ' खांबोबाय
बिखानि अननायजों
दान्दिसे जिउखौ आलो - आलो ।
नोंनिनो जोनोमा जेरावनिफ्राय
आंनिनो जोनोमा नोंनिफ्राइ
नोंनि बैसोआ आथाल - आथाल
आंनिनो बैसोआ थुंगे - थुंगेगासे ।
नोंनोबो होनो
आंहा जेबो गैया
खालिबोल' दं,
हाजों दाजानाय मोनसे सोलेर ।
आंनि जोनोमा
जेरैनो फैदों ,
आं थैबोलाबो
एरैनो थांफिनगोन
लाथिख' आखाइ गोजायै ।
आय' मिथिंगा
आं बे संसाराव
अरायनि थाखाय गोमालांब्ला
नोंल' थांना थांनानै
आंनि हाजों दाजानाय मोनसे सोलेरखौ
आलो गोजोनै फबना दोननो
खरलेबसे जायगा होदो
नोंनि उदां गोरबो बिखायाव ।