***** आं थांनानै दङ - हारि ******

*** आं थांनानै दङ - हारि ***
    By:- BANGBULA BRAHMA UZIR

* सोरां दं
खोमसिआबो दङ
दाखा जोमैआबो साग्लोबहां
गोजों अख्रांखौ ।।

  खांखुवा गोलेर दानबाबो
मनग्लाबहां अखाफोरखौ
नाथाय हायासै सावफ्लेबाय,
सोरांनि लामाजों
समनि थिन्नाय फाखनाव ।।

  हरै - मारुनि बोरियाव
बबेबा गोरान जायगायाव,
जग्रबसे थास' लाइफांनि बारि,
बेयावनो थाखुमानानै थानाय
सोरबा हावरियानि मेगनाव
थरथिंसे मोदै जिरिनाय। ।।

 बोहैबाय थागोन गोर्बोयाव
दुंब्रुद थैनि गोजा नेर्सोना
मंगलियान गाबनि फिरफिलायाव ,
आखाइजों दानाय हारिनि हिसान सियाव,
दावखौऔबादि गारांनि बिमाराव,
आय' बिरहोगासै , गानगासै, खनगासै ,
माहारिनो बावनो रोंमोनथाइ - हारोंथाइ ,
सोराङाव लाबोनो फोरोंथाइ - सोलोंथाइ ,               
हारि - उदांस्रिनि थुलुंगागिरि जानानै,              
हावरियानि मेगन मोदैखौ नुनानै,                              
आं गोथाङै थांना दङ ।।

  खोमसि दं
सोराङाबो दङ
दाखा जोमैआबो लासैयै
गोजों अख्रांखौ दाबोबाय ।।

 गोलेरा मनग्लाबनाय
साननि सोरां रोदायाबो
अरखि जानानै बेरफ्रुसारबाय ।।
सोरांनि गोथों लामाजों
दिङा जावनानै
गुमुरखौ संदानै - दानै
अन्थाइ - जारिमिन मुगा बारना,
हरै - मारुखौ बारस'नानै ,
मोनफैबाय हारिनि जिउ थानसालियाव ।।

हारिनि थुनलाइ थानसालियाव
जिउआबो दान्दिसेयै
हारिनि थुनलाइ संसारखौ
आगोमा जिउजों आखाइ खबजबनानै
रोखा - रोखा बोस्राना मोनथाइ होनो
आं गोथाङै थांना दङ ............
                   हारि .............।।
********************************