****** जोमै हान्जा *****

** जोमै हान्जा ***
By - BANGBULA BRAHMA UZIR

** बे गुवार गंसे अख्रांनि
जांख्रिखां हान्जा मोनसेनि
उन्दै- गेदेर हान्जासे हारिनि
जोंलाइ मोनसे रोखोमनि
खौसेयै जोमै हान्जा।

जोंहाबो दं
बायदि गाबजों समायनाय
सि - जोम , गाननाय - जोमनाय
बायदि आगरनि आरनाइजों
महर - मुस्रिया मोदान सारफ्रावनाय
जोंलाइ खौसेयै रोखोमसेनि
जोमै हान्जा।

मानोना
उदां गोसोआ बिरथिंबायोब्लाबो
गाबनाय - रंजानायजों लोगोसे
जोंनि देहा - इसिंनि
गोर्बो बिखा मोनसेयावबो
मोजोमसे गोथार अननाय दं ‌।

हाबाब
दं जोंहा साननो रोंबा
गावनि हारिनि राव थुनलाइ हारिमुखौ
खौसेयै आखाइ हमज्लायना
नों दानागार - आं दानागार
जयै खौसे अनज्लायना
गोरोबनानै हारिमुखौ जौगासारहोनो
गंसे अख्रांनि हान्जासे
जोंलाइ जोमै हान्जा।

आय'
जोंलाइ एखनब्ला
सानस'नो हायैआव
मानो बिब्दि खालामफ्लाङो ?
हारि - माहारि उदांस्रिनि थाखाय
एना - एनि, दावराव - दावसि
मानो खालामो गावजों - गाव
सिलाइ - बारुटनि गुलि गावनाय,
बमनि बेरफ्रुना अरनि मोफ्लामनायजों
खायसेबा आलाइ - सिलाइ, छेरा - बेरा ।
थाइनै मेगनजों रुखु - रुखु
दुखुनि जाख्रिसे मोदै बोहैनायखौ
खायफाबा खाफाल हमना
हांमा गोलाउ सुरना बुंदोंसै.............
" आय' गावजों - गाव जोंलाइ
मानो बिब्दि खालामखो
जोंलाइ गंसे अख्रांनिनो
खौसेयै जोमै हान्जा "।
***********************************