LIHIM NA PAGTINGIN

Hindi ko alam kung makakarating sayo 'to pero dito ko sasabihin ang mga salitang hindi ko masabi sayo

Alam mo? Gusto kita...
Gusto kitang ipakilala sa kanila at ikwento sa kanila kung gaano ka kabuti.
Gusto kitang makasama sa mga pangarap ko at maging parte ng buhay ko
Gusto kitang ipagdamot at gusto ko ang lahat sayo.

Gustong gusto kita...
Gusto ko ang bawat ngiti mo, gusto ko ang katangian mo
Pero ayokong aminin ang tunay na nararamdaman, natatakot na baka ako'y layuan mo
Kung pwede lang sana akong umamin, matagal ko na sanang ginawa.

Pinilit ko namang pigilan, kaso...
sa tuwing maririnig ko ang bawat galaw ng gitara mo, ang mga boses mong parang hipnotismo.
Sa tuwing magtatanong ka sakin, nakangiti na ako.
Sa tuwing kakausapin mo ako, parang ayoko na lang tapusin ang bawat sandaling ito.

Ewan ko ba, pero pag dating sayo hindi ko kayang pigilan ang mga pag-tingin ko sayo.
Parang pinana ako ni kupido ng paulit ulit para sayo.
Kasabay nang bawat galaw ng gitara, ay ang lakas ng tibok ng aking puso.
Sa tuwing magtatama ang ating mga mata ay magkukunwaring hindi ka tinititigan

Ang pagdating mo sa buhay ko ang isa sa mga paulit ulit kong ipagpapasalamat.
Dahil ito ang naging simula nang lahat,
Kung paano kita nakilala, kahit sa internet lang tayo unang nagkausap
Kung paano tayo naging magkaibigan dahil sa mga nagdaang group activity.
At kung paano ako natuto na magtiwala sayo.

Batid kong sana ay hindi mo naririnig ang
bawat pang-aasar satin ng mga kaibigan natin
Sa mga palihim na pagkuha ng litrato tuwing tayo'y magkatabi
Binabalot ako ng hiya, samahan pa ng pamumula ng mga pisngi

Hayaan mo akong patuloy kang gustuhin,
Patuloy na ikaw ang maging dahilan ng pag ngiti ko
Dahil pangako na kahit hindi mo alam ang tunay na nararamdaman ko sayo,
Ikaw pa rin ang gugustuhin sa bawat pag daan ng araw.

Kung hindi ka para sakin
Gusto ko lang sabihin na...
Hindi pwede yon. Ipilit natin.
Hindi pwedeng hindi, tayo dapat

Pero di'ba? Nakaka-kaba.
Di alam kung aamin ba o itatago na lang
Yung tipong mapapatanong ka na lang sa mundong walang kasiguraduhan
"Gusto mo pero gusto ka ba?"

Pero ano nga ba ang mas mahirap?
Yung patuloy na paglihim ng nararamdaman sa kanya o ang pag amin na walang kasiguraduhan talaga?
Yung gugustuhin kong maging masaya tayong dalawa o ang makitang masaya siya kaso sa iba nga lang?